喺啱啱過去嘅除夕晚，黃曉明就同女朋友 Angelababy（楊穎）靜雞雞去咗澳門燒煙花，以為神不知鬼不覺拍拖會冇人知，但係就俾網友踢爆，放曬啲相上網斷正。原本以為黃曉明玩完就返內地繼續銀，但原來佢趁春節呢個長假期嚟咗香港會 Baby。今次又係俾網友爆料，話喺年初五嗰日，見到黃曉明同 Baby帶住經理人做掩護，拍拖去睇黃百鳴套賀歲片《最強囍事》。嗰個網友仲話睇戲嘅時候，曉明同 Baby兩個攬到實，但一散場男方就極速戴帽同口罩離開戲院，留低 Baby同經理人殿後；睇完戲嘅 Baby同晚亦喺自己嘅微博大讚黃百鳴同杜汶澤做得非常出色。
黃曉明初七嗰日同助手去中環掃貨，咁高調嘅活動自然冇 Baby份。
放大圖片 
除夕晚 Baby同曉明靜雞雞去咗澳門放煙花，仲俾網友影曬相踢爆。資料圖片
初七留港血拼
前日大年初七黃曉明就同一男一女助手出現中環一間名牌時裝店入貨，當時佢雖然都係戴曬口罩同帽，但就好應節著咗一條鮮艷紅褲出現。只見佢見貨就買完全唔使睇價錢，短短 30分鐘就掃咗兩大袋戰利品由女助手放上車。當黃曉明發現有記者喺門口等時，佢索性除咗口罩以靚樣行出嚟見記者，記者同佢拜年佢都好有禮貌保持微笑，只係當問佢有冇去同 Baby拜年時，佢就面色一沉急步上車離開。 
Baby可以同男友一齊度歲，係女仔都鍾意啦，何況曉明仲陪咗佢咁多日。資料圖片
