工聯會有成三十五萬會員，今年將派出四十幾人浩浩蕩蕩出戰區選，加上總舵主鄭耀棠又係行政會議成員，位居權力核心，政治實力的確唔係嘢小。由於工聯會舉足輕重，所以近排有消息話棠哥身患惡疾，情況幾嚴重，各方都極之關注。
近月棠哥謝絕應酬，甚少公開亮相，自然引來諸多揣測，直至早幾日工聯會班頭頭同記者團拜，佢老哥終於露面，現場所見，佢瘦咗成個碼，雖然氣色唔錯，但中氣就弱咗，而且行路對腳拖嚇拖嚇，好似冇力咁，要職員攙扶，睇嚟問題唔細。
棠哥自己透露病情，原來係頸椎嚴重移位，過去三四個月已近乎半癱，雖遍尋各方名醫搞過一輪，仍然未見起色，且有惡化趨勢，情況可大可小，佢同家人都好擔心。
點解搞到咁大鑊？小弟綜合棠哥及其友好所言，得知箇中詳情。原來佢老哥長期頸梗梗，早已覺有問題，但冇乜點理，平日亦冇做柔軟體操，以為係小事啫。舊年十月棠哥同友好去武當山旅遊，山路陡峭又冇吊車，上落山行咗三萬幾級石級，到返番山腳，佢忽然覺得手腳麻痹，幾乎要暈低，當時仲以為中風，嚇到面青。
返港之後，佢立即搵骨科醫生詳細檢查，仲照埋磁力共振，發現原來頸椎移咗位，呢種病乃由脊椎退化及勞損造成，可以好大件事。當時佢亦覺四肢無力，連筷子都拎唔起，惟有深居簡出，推卻各種活動，由於手腳不靈，連胃口都冇埋，體重暴跌咗二十幾磅。
