Celia Yau
著名形象設計師黃欐堯Celia,曾任陳慧琳、謝安琪、孫耀威、江若琳等藝人的形象設計,亦有參與唱片封套形象設計及演唱會形象指導,也是潮服店DaDa的老闆娘。早年出書教人襯衫扮靚,近年主力負責個人形象和美容指導,還開設個人網誌http://prochats.she.com/celia-wong,分享服裝潮流及扮靚心得。
Pass
張栢芝 過分成熟
張栢芝一身PRADA服飾,成個look好復古好冷艷,不過她個子不算高,裙卻太長,令她相對顯得矮了一截,雖然她已穿上高跟鞋,但亦無補於事。
Celia教路:
條裙改短兩三吋,成個look會靚好多。
Bad
陳法拉 師奶街坊
陳法拉的打扮好得意,一時好靚好高貴,一時又好求其,像這身打扮好師奶,好似求其著落街買嘢咁,出席活動可以casual,但這套衫casual得來,似街坊裝,唔好睇!
Celia教路:
建議她換過套衫,casual都可以好有型!
Good
周麗淇 色彩分明
周麗淇這身打扮好靚好型,橙色裙色彩已相當奪目,配襯黑色長boot、黑色長手套,及黑色belt,色彩分明,再佩戴兩隻黑、金色手鐲,令整個look錦上添花。
Good
莊思敏 惹火女郎
莊思敏整個look幾好,好搶、好靚、好sexy,tube top突出其加建後的上圍,火紅色夠惹火,容易引人注目。她夠高,穿長boot更見身材高挑,成身配埋好醒神。
Bad
陳自瑤 MK Look
老實講,陳自瑤這身打扮毫不起眼,同樣穿boot,束belt,但卻顯得很平淡,色調配搭明顯錯曬,還有少少MK feel。
Celia教路:
裙子挑選較鮮艷顏色,對比大啲,整體更佳。
Pass
吳君如 皮褸太鬆
看君如近日出席活動的衣著,明顯經過悉心配襯,這夜一身皮look,穿上高跟鞋,跟身旁的古仔互相襯托相當好看。只是略嫌皮褸太鬆,她亦醒目地束了一條belt,令視覺上更佳。
Good
古天樂 全身絕配
古天樂這身由頭到腳的啡色打扮十分有型醒目,皮褸、絨褲、皮鞋,加上配襯的頸巾色調亦襯到絕,身形高大又健碩的他,基本上穿乜都好睇。